22 июля 2009 г.

Дарали : Pozdeeff без купюр.

Паша Поздеев удмурт дуннее выль шом пыртиз. Тросэз понна городын удмурт шормучъёсты кылдытон – йоспортэм но шугомытись уж. Удмуртлык гуртын гинэ пушъе уго. Кызьы бен утёно удмуртлыкмес, городэ дышетскыны, ужаны вуыса? Пумиськонъёс пыр! Соос бордын ик «Юмшан промо» огазеяськонлэн пайдаез. Удмурт ужрадъёс калыкез люканы быгато, отысен ик кутско ваче вераськон, чош ужъёс, дискотекаын ке но удмурт кыл чузъяське.
Паймоно Пашалэн кынарызлы. Куд-огез малпалоз: «Кытысь потиз та Поздеев?» Котькытын выль проект малпаны, котькинэн кыл тупатыны быгатэ. Мукет сямен малпаське. Кыче улон школаез ортчоно со понна? Кызьы луоно режиссер? Кызьы валано туала улонэз? Кызьы луэ берен берытскыны удмурт выжыосыд, кылэд дине?

Пичи дыр
- Пичи дыръяд удмурт луыны «модно» ой вал, лэся. Соин удмурт кылэз уд тодиськы…
Вордӥськи черкогуртын, Дэбесын. Берло вакытэ уксё кризисэн валче, уж ӧжытгес сюре бере, удмуртэз сярысь малпаськыны дыр тросгес кыле но… Та юанлы удмурт контекстын ик веран сюре. Азьло школаосын нимаз программаен А, Б, В классъёс вал. Нимаз классын удмурт пиналъёс но дышетскизы. Самой яркыт тодэ ваёнъёсы, кызьы ми школаысь пиналъёсын ӵош урмыса бызьылӥськом но Ц классын дышетскисьёс шоры кесяськиськом: «Вотяки! Вотяки!» Таиз социальной ужпум ласянь. Со вал 1983-тӥ арын. Ваньзы озьы каро вал, мон но…

Уйпал но лымшор удмуртъёс
- Вань стереотип, уйпал но лымшор удмуртъёс пӧртэмесь шуыса. Ас вылад шӧдӥськод-а?
Лымшор удмуртъёс, ӟуч сямен вераса, массовоесьгес, нош уйпалъёс – камерноесьгес… Мон малпамъя, лышморъёс ӵош ужаны быгатэменызы кужмоесь, но соос пӧлын ӧжытгес, кызьы мон нимасько, «персонажъёс». Уйпалан, историез эскерыса, трос «яркыт» адями вордскемын. Революцилэсь азьло вакытъёсты уг вераськы, туннэ нуналэз ик басьтом: егитъёсыз удмурт артистъёс пӧлысь тужгес но аспӧртэмлыкоез, калыклы кельшисез – Алексей Ложкин. Политикъёс пӧлын но озьы ик, кылсярысь, С. К. Смирнова.

Спорт
Пичи дырме, егит дырме мон куас вылын бызьылонэн герӟай. Асме быдэскын спортлы сӥзи. Нокыӵе культура, творчество сярысь малпанъёсы ӧй вал. Тол но, гужем но тырши тренировкаосы ветлыны, ялан бызьылӥ, бызьылӥ, мугорме тазатӥ. 9-ти класс бере Чайковский каре дышетскыны пыри, огаз техникумлэн куасэн ӵошатсконъя сборнояз сюри. Сӥзьыл шодтэк шорысь луиз могдос. Тренироваться кариськи аслэсьтым арлыдогес ӧнерчиосын, аресэлы тупасьтэм быдӟалаосыз вормыны тырши. Сӧризы… Мугор ӧз ни кылзӥськы, ӟеч лыдпусъёсы быризы. Вормонъёсы ӧй вал бере, мылкыды но ышиз. Пичиен-пичиен спортлэсь куштӥськи…

Дышетскон
Бертӥ Дэбесэ. Со вакытэ пумен крезьгурен тунсыкъяськи, соку ик крезьгурен экспериментировать карыны малпай. Школаын дискотекаос ортчытъяны ӧдъяй. Шоркин, «Шулдыр ӝыт», ӵапак Геннадий Бекманов альбомзэ поттӥз… Соослэсь крезьгурзэс ӟуч, шундыпуксён пал гуръёсын ӵош шудылӥ. Конешно, со вал стёб, серекъян выллем гинэ. Дэбес клубын дискотекаос ортчытылӥ. 11-тӥ класс бере юан султӥз, кытчы дышетскыны пыроно.
Адӟи объявление, Ижысь культпросвет училище «организатор досуга» специальностья дышетскыны ӧте шуыса. Мон соку наивно кожасько вал, организатор досуга – со дискотекаосты радъясь. Соин ик мынӥ «кулёке». Кызьы тодмо луиз, та кылъёс сьӧрын ватскемын вылэм режиссура висъет. Шӧдтэк шорысь режиссерлы дышетскыны кутски. Озьы тӥни сценаез гажан, «экшн» шуонлы яратон кылдӥз.
Мон уг ватӥськы, мон попсовой адями шуыса. Удмуртсэ валаны, тунсыкъяськыны кутски «Иван Купала» группалэн крузьгуръёсыныз тодматскеме бере. Нырысьсэ кылыса, малпай, малы тазьы ик уг луы удмурт крезьгурен лэсьтыны? Со бордысен ик удмуртэныз тунсыкъяськон кылдӥз.

Юон
Училищеын мон, жаляса верано, юыны кутски. Кыӵе ке «удмурт сям» сярысь вераме уг поты, мон уг малпаськы, алкоголизмлэн национальностез вань шуыса. Тросэз социальной шуг-секытъёс удмурт шуыса пусйисько, нош со гуртэз аналтонэн сэрен гинэ озьы пӧрме. Сыӵеез котькытын вань, асьмелэн гинэ ӧвӧл. Котырам юись муртъёс вал бере, асме но «кыскиз». Дышетсконме куштӥ, берытски Дэбесэ, клубын ужаны кутски. Отын юон эшшо золгес «кыскыны» ӧдъяз. Одӥг вакытэ валай, ӧй дугды ке, юон пӧлы выё. Номыр но умоез та бордысь уз поты.
Юонтэм улонэлэн шуак аслаз емышез кылдӥз. Кышнояськыса вуттӥ, пие вордскиз. Но ӵош улыны ӧз кылды. Иже кошки, культпросветын дышетсконме йылпумъяй. Отын мон «вечной студент» нимын ветлӥ. Вал пӧламы кӧня ке адями, кудӥз укмыс-дас одӥг ар дышетскыны выриз. Мон соос пӧлысь одӥгез!
Заочно дышетски ини Челябинскысь культурая академиын.

Этнофутуризм
Ужаны интыяськи Ижевске, калык творчествоя центре. Со Культурая министерстволэн ёзэтэз вал, вуоно ужрадъёсыз пӧлын пусъим сыӵе фестиваль. Соку этнофутуризмен тунсыкъяськон вӧлмиз. Этнофутуризмлэсь манифестъёссэс лыдӟыса, мынам нырысетӥ юанъёсы кылдӥзы: малы «Иван Купала» - со этнофутуризм ӧвӧл? Адямиос озьы ик вашкала йылолъёсты маиныз ке выленыз сурало, кыре потто, кыӵе ке шоу-проект, коммерци лэсьто. Малы этнофутуризм фин-угор, удмурт контекстын гинэ вань? Со ваньмыз локальной сямлы гинэ пӧрмемын.
Но мон соиз понна сокем ик йырме ӧй тия. Лыдӟи-лыдӟи этнофутуризм сярысь но, валэктон утчаны тырши: малы ӧвӧл «Иван Купала» выллем кырӟасьёсмы, малы ӧвӧл удмурт печатлам суредъёсын кружкаос? Лэсьтыны но секыт ӧвӧл кадь. Та юанъёслы пертчон утчаса, «Новая песня древней земли» фестиваль лэсьтыны ӧдъям.


Удмуртско-этнофутуристический бытовой арт. from Yumshan TV2 (Yumshan Promo) on Vimeo.




Соку ик ӵапак ченгешонъёс кутскизы. Кудӥз ке этнофутуризм валатонлы тупа вал, кудӥз ке уггес… Тодӥсько на керетэмме одӥг кышномуртэн, со нылпиосын эктон дасяз. Со номерды уг тупа, шуисько. Нош малы уг тупа, валэктэме уг луы… Отын номыр сокем тунсыкоез овол. Нош кулэ мар ке аспӧртэмлыкоез, вылез…

Вашкала музъемлэн выль кырзынэз
Инмарлы тау, ӵапак сюризы «Тылобурдоос». Соос быгато калык кырзанэз кызьы ке выль сямен усьтыны. Удмурт крезьёсты африкан барабанъёсын сурало. Чошен «Новая удмуртская песня древней удмуртской земли» фестиваль радъям. Ми валам, удмурт палзэ, жаляса верано усьтыны ом быгатэ шуыса. Оз пӧрмы. Удмуртэз та фестивальын «Эктон корка» но «Тылобурдо» бордын гинэ вал. Борысь нокыӵе выль коллективъёс ӧз кылдэ. Соку мон валай, удмуртлыкез утён понна таӵе амалъёс уг тупало. Этнофутуризмо фестиваль интые фестиваль современной этно-культуры ним понӥм.
Собере кылдӥз Александр Юминов, Уддяди, Карсовай гуртъёсын бичам песянайёслэн гуръёсынызы… Дискъёсызъя ик «Вашкала музъемлэн выль кырӟанэз» нимам.
Котькыӵе сэрегъёсын кесяськи, фестивальлэн нырысетӥ ужез – удмурт лулчеберетэз азинтон. Но та конкретно удмурт ужрад ӧй вал. Со город понна культурной революция выллем ортчиз, но шӧдымон удмурт пушъетъёсты со ӧз ворды.
Кыкетӥез фестиваль мон понна ӧз пӧрмы. Со быдэскын нырысетӥез фестиваль кадь лэсьтэмын вал. «Перепеч пиццалы пумит» ӵошатскон ӧм радъясалмы ке, воксё ярантэм луысал.
Куинетӥез фестиваль вал чылкак мукет. Туж трос дыр кулэ луиз ӵош ужась эшъёслэсь мылкыдзэс воштыны. Мон понна со тужгес но умоез, отысен ик «Юмшан промо»-лы инъет кылдӥз. Отын кӧня ке ужрад ортчиз. Нырысь ваньмыз «Соперницы» кино котыр бергаз, «Вавилон» клубын та куаратэм киноез удмурт сямен «вераськытӥм». Тужгес но кулэлыкоез вал – со удмурт кыл, удмуртлыко луон. Юри малпамы сыӵе ужрадъёс, кудъёсыз борды итиськизы творческой кужымъёс: Саша Корепанов (Дэбесысь «Нос-Провинц» группа – Паша ачиз но отын бас-гитараен шудэм вылэм), Марина Ходырева, «Эктон корка» но мукет... Соку ик ортчиз калыккуспо IFUSCO студент конференци. Карамас-Пельга гуртын «Дэмдор» премия радъям. Пусъемын вал тунсыко адямиос, кылсярысь, «Кама рекордс» крезьгур гожъянни понна Антон Янцен, этномодая «Неофолк» студилэн кивалтћсез Л. Г. Розенфельд, тодосчи Т. Г. Владыкина. Озьы ми тыршим удмурт «лэсьтӥськисьёсты» огазе, артэ пуктыны, котькудӥзлэсь ымнырзэс возьматыны.
Кинэ ке ӧтьыны мурт палась, «ойдолэ ми доры, милям татын этнофестиваль» шуыса, номыр умойзэ удмуртъёс понна, удмурт культура азинскон понна уг вайы. Асьмелэнэз номыр тунсыкоез ӧвӧл ке, ӧтёнэз но юнме. Сыӵе пумиськонъёс-бугыръяськонъёс калыклэн лул дуннеяз мае ке воштыны кулэ, сыӵеез бере вордӥськыны кулэ кыӵе ке выль удмурт «объектъёс». Технология воштӥськиз. Табере юмшан радъясько ке, мон соку ик тырши ни удмурт адямиосты со котыр огазеяны, со понна ужы Аркаим – со вашкала ар кар шуыса, но зэмзэ ке, сокем ик цырам уг басьтӥськы. Удмуртъёс мон понна – со калык, кудӥз кылдӥз 15-16-тӥ дауръёсы национальность кадь кылдӥз. Соизлы мон оскисько.
Уй клубъёсын тросгес кусып возьыса, мон валай ини, юон но клуб – со кык герӟаськем марымъёс. Соин ик куаретыны егитъёсты, соос укыр трос юо шуыса, со серем. Клуб – со нырысь ик культураё инты. Мон лэсьтӥсько ужрад, со котыр ваньзэ радъясько, калыкез ӧтисько. «Авиаторысь» удмурт дискотекаос юись егитъёсты ӧз вордэ. Юись удмуртъёс кызьы вал, озьы ик луозы но, но али со егитъёслэн, урамын ӝус вылын я куак улын юонтэм, капчиен, ог-огенызы вераськыса, выль удмурт крезьгур кылзыса, тунсыкозэ адӟыса юыны-пукыны луонлыксы кылдӥз. Кылдӥз dj Darali, кылдӥзы Silent Woo Goore рок-группа, сыче персонаж Биктур Сандыр. Бен, искусственно кылдытӥськом удмурт «культурной объектъёсты», но соос собере ас понназы улыны кутско, соос удмуртлыклы пайда ваё.
Ми ум вунэтӥське созэ, мар вал ми дорозь. Ум вунэтӥське Быкова Любаез, нырысетӥ удмурт продюсерез Александр Козыревез, «Редукторысь» «Эрик» дискотекаосты, 90-тӥ аръёсты, Леонид Гонинэз, кыкетӥтулкымез – «Ингур» радиоен, Бисар Оксанаен, мукетсэ...

Удмурт андеграунд
- Вань кык удмурт культура полюсъёс – Егор Загребин но Дима Загребин. Нош куинетӥез, удмурт андеграунд?
Удмурт андеграунд – со али осконтэм маке. Уг луы куштӥськыны Загребин Дималэн кырӟанъёсызлэсь, реальность, туала синучкон, сое кыӵе вань, сыӵеен ик пумитано. Конешно, андеграунд вань, но со нимысьтыз тулкымлы, ӧрды ӧз пӧрмы на. «Сайлент ву гур» группа но рок валанъёсъя малы ке пумит кариськыны кулэ кадь, но со номырдлы пумит ӧвӧл. Егитъёслэн мылкыдзы вань дуннеез адӟыны, Финляндие, Эстоние вуылыны, кызьы соос пумит луозы? Мон шуысал, та чылкак коммерци проект, со буш интыез сайяз. Мон ӧй но нимасал соосыз рок кырӟась коллектив,

Sailent Woo Goore, Начало Пути.


«Сайлент Ву Гур» – со вокально-инструментальной ансамбль. Вань гитараос, вань барабанъёс, вань огъя творческой синмын ас учкон. Калык гуръёсты выль сямен лыдњон, выль шӧдон. Сое ниманы луэ инди, яке панк, яке эшшо кызьы ке, но рок социально протест выллем та крезьгурын ӧвӧл.

Sailent Woo Goore/Продолжение Пути



Вуоноез
Куарусёнысен нош ик кутскоз городысь удмурт дискотекаослэн вакытсы. Али трос саклык висъяме потэ театрлы, адзытонъёслы. 15-ти шуркынмонэ туала искусстволы сизем «Арт-Э» фестиваль. Со герзамын эрик Батуевлэн нимыныз. Мон понна, Эрик – нырысетиез удмурт сюрреалист, со кылбурчи, журналист сяна, туала художник но. Со кадь быгатись егит удмуртъёсты утчано… Соин ик портэм номинациос усьтим: кырзан, туала эктон, театр миниатюраос, крезьгуро эксперименъёс, видео, проза но поэзия, хэнд-мэйд – киужъёс. Ваньзэсты пыриськыны отиськом. Иворъёсты шедьтыны луэ www.yumshan.ru но www.yumshanpromo.blogspot.com сайтъёсын. Азьланяз милям трос малпанъёсмы: крезьгуро «Эктоника» удмурт радиопередача, удмурт чыры-пырыосын лавка, удмурт кылъя курсъёс – «Авиатор» клублэн шутэтскон люкетаз, удмурт клипъёс – ваньмыз та каллен зэмослы порме…

Карьера но семья тупало-а?
Уг.

Ватэм малпанэд?
Удмурт клуб.

Малы оскиськод?
Адњонлы, учырлы.

Дарали Лели.

Комментариев нет:

Отправить комментарий